Прага билігі жергілікті тұрғындардың шағымдарына, сондай-ақ қауіпсіздік мәселелеріне байланысты жиналған туристік топтарға түнде пабтар не басқа да ішімдік ішілетін орындарды аралауға тыйым салу туралы шешім қабылдады, деп жазады inbusiness.kz сайты.
Қалалық шенеуніктердің айтуынша, кешкі сағат 22.00-06.00 аралығында, ең алдымен, шетелдік туристерге арналған түнгі паб-турларға қатысуға тыйым салынады.
Прага қалалық мэриясы заңнамаға "туристердің, әсіресе қала орталығында түн тыныштығын бұзатын пабтарды аралап қыдыруын" шектейтін түзетулерді мақұлдады.
Мэрдің орынбасары Иржи Поспишил қаланың "мәдениеттілік пен қоғамдық кеңістікті құрметтеу басымдыққа ие" орынға айналуын қалайтынын айтты.
Чехия астанасының билігі де мас туристердің көптігі қаланың беделіне кері әсер етеді деп шағымдануда.
Прага шулы туристер тобымен күресіп жатқан жалғыз қала емес. Бұған дейін Венеция, Амстердам, Барселона мен басқа да танымал туристік бағыттардың билігі осындай шаралар енгізбек болған.
Заңның орындалуын полиция тексеретін болады.
