Президент Нұрсұлтан Назарбаевтың тапсырмасымен премьер-министр Бақытжан Сағынтаев Ақтөбе облысына келді, деп хабарлайды үкімет басшысының баспасөз қызметі.
Бақытжан Сағынтаевтың жұмыс бағдарламасында өндірісті технологиялық жаңғырту және цифрлау мәселелері жөнінде өнеркәсіп кәсіпорындарының ұжымдарымен, сондай-ақ өнімді жұмыспен қамту және жаппай кәсіпкерлік мемлекеттік бағдарламасының жүзеге асырылу мәселелері жөнінде облыс жұртшылығымен кездесуі жоспарланған.
Сонымен қатар мемлекеттік-жекеменшік әріптестік аясында салынған ірі инфрақұрылымдық, білім беру және медицина нысандарын аралайды деп жоспарланған. Сондай-ақ премьер-министр "Нұрлы жер" бағдарламасы аясында тұрғын үй нысандарының құрылысымен танысады.
Айта кетейік, Ақтөбе облысының Қазақстан үшін маңызды әлеуметтік-экономикалық маңызы зор, өйткені президенттің тапсырмасына сәйкес мұнда ауқымды агломерация дамып, заманауи урбанистік орталық құрылады. Сонымен бірге облыста бірқатар ірі өнеркәсіп және инфрақұрылым кәсіпорны орналасқан.
Еске сала кетейік, премьер-министр Қазақстан өңірлеріне жұмыс сапарын бастады. Жоспарланған кестедегі бірінші облыс Шығыс Қазақстан облысы болды. Сонан соң Батыс Қазақстан облысын аралады, ал бүгін Ақтөбе облысына келді.
