Мемлекет басшысының айтуынша, "облыс экономикасын дамыту бойынша мұнай-газ химиясына үлкен үміт артылған".
"Бұл салада біз артта қалып отырмыз. Ал бұл – өңірдің және бүкіл елдің болашақ экономикасының негізі", - деді Тоқаев бейсенбі күнгі кеңесте.
Мемлекет басшысының сөйлеген сөздері баспасөз қызметі таратқан хабарламада келтірілген.
Сонымен қатар, ол "Ұлттық индустриялық мұнай-химия технопаркі" арнайы-экономикалық аймағының (АЭА) тиімділігі көптеген сұрақтар тудыратынын атап өтті. АЭА инфрақұрылымының құрылысы аяқталған жоқ. 2015 жылдан бастап АЭА дамытуға 162 млрд теңге бөлінсе де (ағымдағы бағам - 432,01/$1), бір ғана жоба іске қосылған.
"Полипропилен мен полиэтилен өндіру бойынша ірі жобалар әлі іске асырылған жоқ. Өйткені инвесторлар табылмады және өткізу нарықтары анықталған жоқ. Үкімет пен "Самұрық-Қазына" қоры осы жобаларды іске асыруды жеделдетуге тиіс", - деді Президент.
"Алмасадам Майданұлы, сізден мұнай-газ химиясы саласындағы жобаларды қор жұмысындағы басым бағыт ретінде қарауды сұраймын. Осы бағыттағы барлық жұмысты ерекше бақылауға алыңыз", - деді ол "Самұрық-Қазына" қорының басшысы Сатқалиевке.
