DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 323,36 Brent 36,55
Президент банктерді бизнеске қолдау көрсетуге шақырды

Президент банктерді бизнеске қолдау көрсетуге шақырды

ШОБ қазан айына дейін еңбекақы төлеу қорынан ұсталатын салықтан босатылады.    

31 Наурыз 2020 22:24 356

Президент банктерді бизнеске қолдау көрсетуге шақырды

Президент Қасым-Жомарт Тоқаев республикалық телеарналардың эфирінен Қазақстан халқына жолдаған үндеуінде төтенше жағдай кезінде шағын және орта бизнес өкілдеріне (ШОБ) қандай қолдау көрсетілетінін жариялады.

«Бұған дейін ШОБ-ты қолдауға қатысты салық преференциясы, қарызды қайтару мерзімін шегеру және басқа да шараларды жарияладым. Шағын және орта бизнестің маған жасаған ұсынысының басым бөлігі мемлекеттік органдар тарапынан жүзеге асырылып жатыр. Бұл – мемлекеттік қолдау көрсету кезінде басымдық берілетін қызмет түрлерін кеңейту, несиенің сыйақы мөлшерлемесін азайту сонымен қатар мемлекеттік кепілдікті ұлғайтуға қатысты мәселелер», – деді Президент.

Қасым-Жомарт Тоқаевтың мәлімдеуінше, қаржы нарығын реттеу агенттігі ШОБ-тың несие төлеу мерзімін шегеруге қатысты мәселесін банктермен және қаржы ұйымдарымен талқылап жатыр.

«Осы сұраққа жеке тоқталғым келеді. Кәсіпкерлердің дені төтенше жағдай кезінде банктерге несиеге сыйақы есептемеуді бұйыруды сұрап жатыр. Бұл банктерді табысынан қағатын, шығынға ұшырататын жағдай екенін түсіну қажет. Банктер де экономиканың ажырамас бөлшегі. Сондықтан мен тағы да екінші деңгейлі банктерді азаматтық жауапкершілікке, конструктивизмге шақырамын. Банктерге қиын болған кезде мемлекет қол ұшын берді. Қазір сіздерден халыққа, отандық бизнеске қолдау қажет», – деді Мемлекет басшысы.

Президенттің сөзінше, жағдай ары қарай ушығатын болса, үкімет пен қаржы реттеушісі шара қабылдайды.

«Кәсіпкерлер қосымша салықтық жеңілдікке мұқтаж болып отыр. Бұл жұмыспен қамту және жалақы төлеу үшін аса маңызды мәселе. Сондықтан шағын және орта бизнес субъектілерін биылғы жылдың 1 қазанына дейін еңбекақы төлеу қорынан ұсталатын салықтан босатуды тапсырамын.

Мұндай қолдау сауда, көлік қызметі, қонақүй, туризм және басқа да салаларды қамтиды», – деді Қасым-Жомарт Тоқаев.

Қанат Махамбет

inbusiness.kz-ті қараңыз, оқыңыз :

Жедел штабқа 32 мыңнан астам өтініш түсті

Өтініш иелерінің 86%-ы қаржылық қиындыққа тап болғанын мәлімдеді.

17 Сәуір 2020 16:53 120

Жедел штабқа 32 мыңнан астам өтініш түсті

Орталық коммуникациялар қызметінде өткен онлайн брифингте төтенше жағдай мен карантин кезінде бизнесті қолдау және жұмыс орындарын сақтап қалу бағытында қандай шаралар атқарылып жатқаны жарияланды. «Атамекен» ҰКП басқарма төрағасының орынбасары Ербол Үстеміров сөз басын кәсіпкерлерден қанша өтініш келіп түскенінен және палата қалай әрекет еткенінен бастады. 

«Елімізде төтенше жағдай жариялана салысымен «Атамекен» ұлттық кәсіпкерлер палатасы жанынан жедел штаб құрылды. Ол төтенше жағдайдың салдарынан экономиканың түрлі секторларында туындаған мәселелерді анықтап, оны шешу жолдарын қарастырды. Орталық аппарат пен өңірлердегі жедел штабтарға call-орталық арқылы 32 мыңнан астам өтініш келіп түсті. Кәсіпкерлердің 74%-ы - жұмыспен қамту, 54%-ы  – қызметкерлерді ақысыз еңбек демалысына шығару немесе жұмыс күнін қысқарту, 20%-ы  – еңбек шартын бұзу мәселелелерін көтерді. Өтініш иелерінің 86%-ы  – қаржылық қиындыққа тап болғанын мәлімдеді. 59%-ы  –жалға алу ақысын, 5%-ы  – коммуналдық ақыны, 22 %-ы қызметкерлеріне жалақы төлей алмай жатқанын жеткізді. Палата кәсіпкерлердің өтініштері мен ұсыныстарын мұқият зерделеп, төтенше жағдайдың салдарын жұмсартудың нақты іс-қимыл шараларын қалыптастырды», – деді Ербол Үстеміров.

Оның сөзінше, кәсіпкерлердің 31%-ы  – несие төлеу мерзімін шегеруді, 33%-ы – төтенше жағдайды «форс-мажор» деп қабылдауды, 28%-ы  – салық жеңілдігін жасауды, 8%-ы  – еңбек ресурсына қолдау көрсетуді сұраған. 

«Атамекен» ұлттық кәсіпкерлер палатасы үкіметпен, орталық мемлекеттік органдармен, жергілікті атқарушы билікпен  кәсіпкерлерге мемлекеттік қолдау көрсету бағытында жұмыс істеп жатыр. Басты мақсат – төтенше жағдай кезінде бизнесті тығырыққа тірелуден сақтау», – деп қорытты сөзін басқарма төрағасының орынбасары. 

Қанат Махамбет 

Бизнес-омбудсмен Рустам Жүрсінов бизнеске қатысты тексеруді тоқтата тұруды сұрады

Кәсіпкерлер мемлекеттік инспекторлардың өздері ауруды тасымалдаушы болуы мүмкін деп қауіптенеді.

20 Наурыз 2020 18:03 169

Бизнес-омбудсмен Рустам Жүрсінов бизнеске қатысты тексеруді тоқтата тұруды сұрады

Бизнес-омбудсмен Рустам Жүрсінов еліміздің Премьер-министрі мен Бас прокурорына кәсіпкерлік субъектілеріне қатысты жоспарланған тексерістерді Қазақстан Республикасының барлық аумағында жарияланған төтенше жағдай мен Нұр-Сұлтан және Алматы қалаларында енгізілген карантин аяқталғанға дейін кейінге қалдыру бойынша шаралар қабылдауды сұрап хат жолдады.

Ел Президентінің Қазақстандағы қызметкерлерді 70%-ға дейін қашықтықтан жұмысқа ауыстыру тапсырмасына сәйкес Қазақстандағы көптеген кәсіпорын мен ұйымдар қызметкерлердің бір бөлігін қашықтан жұмыс істеуге жіберді, қалған бөлігі қысқартылған күн тәртібі бойынша жұмыс істейді.

Осындай жағдайда бақылаушы органдар тарапынан тексерулер басталды және олар келген кезде барлық жауапты қызметкерлер жұмыс орнында болмайды, ал кейбір объектілер жабық.

Сондай-ақ, кәсіпкерлер мемлекеттік инспекторлардың өздері ауруды тасымалдаушы болуы мүмкін деп қауіптенеді, себебі олар бірнеше тексеру субъектісінде болады ғой.

Осы мәселеге қатысты кәсіпкерлерде көптеген сұрақ  туындады. Бизнес-омбудсменнің атына және «Атамекен» ҚР Ұлттық кәсіпкерлер палатасына кәсіпкерлерден көптеген шағым түсіп жатыр.

Бұл ретте, өртке қарсы қауіпсіздік органдары сияқты кейбір мемлекеттік органдар үй-үйді аралау, ұсынымдарды тарату және халық арасында оқыту жүргізуді тоқтата тұрғанын, ал кәсіпкерлік субъектілеріне қатысты осындай шаралар қабылданбағанын атап өту қажет, бірақ дәл осы бақылау субъектілері жабылып, қызметкерлерді босатып, өз қызметін төтенше жағдай режимінде оңтайландырып жатыр.

«Сонымен қатар, карантин талаптарының орындалуын бақылаумен тікелей байланысты тексерулер, сондай-ақ халықтың өмірі мен денсаулығына, қоршаған ортаға, заңдылық пен қоғамдық тәртіпке жаппай қауіп төндіретін бұзушылықтардың алдын алуға және жоюға бағытталған тексерулер толық көлемде жүргізілетінін атап өткім келеді», – дейді Рустам Жүрсінов.

Жаңалықтарға жазылу: