"Былтыр Қазақстан халықаралық Али баба платформасына үздік 100 экспорттаушыны шығарды. Ол жайлы біздің Сауда және интеграция министрі тиісті баяндама жасаған болатын. Осылайша, Қазақстан тауарларының 4 мыңға жуық түрі әлемдік нарықтарға шықты. Шекаралар жабылып жатса да, біз экспорттық ағымдарды қайта құрылымдай алдық. Мәселен, миялы майды өндіретін отандық өндірушілері өз өнімін Катар мен АҚШ-қа экспорттау мүмкіндігіне ие болды. Біз сонымен бірге мұздатылған етті диверсификациялап, Қытай мен Орталық Азия, Таяу Шығыс елдеріне жөнелте бастадық", - деді Қасым-Жомарт Тоқаев Шетелдік инвесторлар кеңесінің 33-ші жалпы отырысында.
Президенттің айтуынша осы жолмен Қазақстанның тамақ өнімдерін тасымалдау географиясын шама-шарқынша ұлғайта беру керек.
"Жалпы мал шаруашылығының сапалы әрі экологиялық тұрғыда таза өнімін экспорттау – біздің негізгі басымдығымызға айналуы керек. Отандық өнімдердің халықаралық деңгейде мойындалуына да баса маңыз беру керек. Сауда және интеграция министрлігі мен Ауыл шаруашылығы министрлігі осы мәселені жіті назарына алуы тиіс", - деді ол.
Аян Бекенұлы
