Президент Қасым-Жомарт Тоқаев Үкіметтің кеңейтілген отырысында арзан несиені малшыларға және ауыл шаруашылығы өнімін өңдеушілерге берген жөн екенін баса айтты, деп хабарлайды inbusiness.kz сайты.
Оның айтуынша, агроөнеркәсіп кешенінің әлеуетін арттыру қажет.
"Былтыр экономиканың басқа салаларына қарағанда ауыл шаруашылығы даму қарқыны бойынша алға шықты. Бұған көктемгі егіс науқанына берілетін арзан несие көлемін едәуір арттырудың арқасында қол жеткіздік. Биыл осы науқанға кемінде 700 миллиард теңге бөлу керек.
Арзан несиені малшыларға және ауыл шаруашылығы өнімін өңдеушілерге берген жөн. Тиімділігі төмен субсидиялау тәсілінен жеңілдікпен несие беру тәсіліне көшу қажет. Мен бұл мәселе жөнінде осыған дейін де айттым. Осы міндетті орындау керек", - деді Мемлекет басшысы.
Қасым-Жомарт Тоқаев былтыр ел диқандары мол астық жинағанын еске салды. Бірақ бидай бағасы тым арзандап кетті, дейді ол.
"Шаруаларды қолдауға және ішкі нарықты тұрақтандыруға Азық-түлік корпорациясы атсалысты. Бірақ бұл – уақытша шешім.
Көбірек табыс әкелетін дәнді-дақылға көшуді жалғастыру қажет. Сондай-ақ шикізатты сақтау және оны терең өңдеу мүмкіндіктерін арттыру маңызды. Өнімді шетелге шығаруға қолдау көрсету керек.
Малдың жұқпалы ауруларына қатысты ахуалды, соның ішінде екпе егу мәселесін ерекше бақылауда ұстаған жөн. Мал шаруашылығының экспорттық әлеуеті осыған байланысты", - деді Президент.
