Мемлекет Басшысы Қасым-Жомарт Тоқаев диқандарды жаппай егін жинау науқаны аяқталуымен құттықтады, деп хабарлайды inbusiness.kz Ауыл шаруашылығы министрлігінің баспасөз қызметіне сілтеме жасап.
"Дихандарымыздың жоғары кәсібилігінің, өз ісіне адалдығының және қажырлы еңбегінің арқасында агроөнеркәсіп кешені азық-түлік қауіпсіздігінің сенімді кепіліне және экономикалық дамудың басты қозғаушы күшіне айналды. Біз тұрғылықты жеріне қарамастан барлық азаматтардың жан жақты дамуына бірдей мүмкіндік берілетін Әділетті Қазақстанды құрып жатырмыз. Сондықтан ауыл тұрғындарының әл-ауқатын арттырып, тұрмыс салтын жақсарту – біздің басты міндетіміз. Барша дихандарға зор денсаулық пен бақ береке тілеймін", – деді Президент құттықтау хатында,
АШМ мәліметі бойынша, биыл нан өнімі бұрын белгіленген болжамды деңгейден асып түсті. Мәселен, жоспарланған 19,5 млн тонна бункерлік салмақтағы астықтың орнына бүгінде 21,7 млн тоннадан астам астық бастырылды.
Сонымен қатар 16,3 млн тоннадан астам бидай жиналды, бункерлік салмақта 14,1 млн тонна жиналады деп болжанған болатын.
Бұдан бұрын хабарланғандай, Қазақстанда 2021 жылы дәнді дақылдар (күрішті қосқанда) және бұршақ дақылдарының жалпы өнімі бастапқы белгіленген салмақ бойынша 17 млн 345,9 мың тоннаны, ал аяқталғаннан кейінгі салмақ бойынша 16 млн 375,9 мың тоннаны құрады.
Өткен жылы Қазақстанда дәнді және бұршақ дақылдарының түсімі 2020 жылмен салыстырғанда (20,06 млн тонна) 18,2 пайызға төмендеген. Қысқарту еліміздің бірқатар өңіріндегі құрғақшылыққа байланысты болды.
16 қазанда Қазақстанда Нан күні атап өтіледі. Мерекелік күн 2019 жылы Үкіметтің қаулысымен белгіленді.
