Мемлекет басшысы "Қазақстан Республикасының кейбір заңнамалық актілеріне тауарлардың шығарылған елін айқындау мәселелері бойынша өзгерістер мен толықтырулар енгізу туралы" Заңға қол қойды, деп жазады inbusiness.kz сайты.
1. Отандық тауар өндірушілер тізілімі енгізіледі
Жаңа заң аясында "Электрондық үкімет" инфрақұрылымы арқылы жұмыс істейтін Қазақстан тауар өндірушілер тізілімі (Тізілім) енгізіледі. Онда елдегі тауар өндірушілер мен олардың өнімдері туралы ақпарат жинақталады. Тізілімге енген кәсіпорындар:
-
Мемлекеттік қолдау шараларына қол жеткізе алады;
-
Мемлекеттік және квазимемлекеттік сатып алуларға қатыса алады.
Сонымен қатар бұрын қолданылған СТ-KZ сертификаты, индустриялық сертификат, сараптама актісі және оларды рәсімдеу тәртібін бұзғаны үшін қарастырылған әкімшілік жауапкершілік заңнан алынып тасталды.
2. Ел ішіндегі құндылықтарды дамытуға басымдық беріледі
Түзетулердің екінші блогы ірі тапсырыс берушілерге ел ішіндегі құндылықтарды дамыту бағдарламаларын әзірлеу және іске асыру міндетін жүктейді. Бұл қағидаларды Үкімет бекітеді.
Сондай-ақ жаңа келісімшарт түрі — кепілдендірілген сатып алу келісімшарты енгізіледі. Ол бойынша өңдеуші кәсіпорын белгілі бір мерзім ішінде өндірілген өнімнің кепілді көлемін жеткізуге міндеттенеді.
3. Бірыңғай жіктеу жүйесі құрылады
Заң аясында Тауарлардың, жұмыстардың және көрсетілетін қызметтердің жалпы сыныптауышы (ТЖКҚЖС) енгізіледі. Бұл жүйе кодтар мен атауларды біріздендіріп, тауарлар мен қызметтерді нақты сипаттауға, қадағалауға және сәйкестендіруге мүмкіндік береді.
ТЖКҚЖС-ты енгізудің негізгі артықшылықтары:
-
Жіктеу жүйесі бірегейленеді;
-
Тауар сипаттамалары нақтыланады;
-
Тауар айналымы мен сәйкестендіру үдерісі жеңілдейді;
-
Көлеңкелі экономикамен күрес тиімдірек болады.
