Алдымен Президент халықты вакцинациялау мемлекеттің қауіпсіздігі үшін маңызды екенін атап өтті.
"Вакцинациялауды созу – абстракт проблема емес. Мұндағы мәселе ұлттық қауіпсіздікке байланысты. Азаматтарға ауру жұқтыру, өлім қаупі төніп тұр. Бизнес табысынан айырылып, бюджетке салық түспей жатыр",- деді Мемлекет басшысы коронавирус індетіне байланысты эпидемиологиялық ахуал жөніндегі кеңесте.
Ол денсаулық сақтау министрінің жұмысына көңілі толмайтынын ашық айтты.
"Алексей Владимирович, бұған дейін мен сізге осы кезеңде (коронавирус пандемиясы – автор) Денсаулық сақтау министрі Үкіметтегі басты тұлға екенін, оның ерекше өкілеттіктері барын айтқамын. Сіз жақсы жұмыс істедіңіз, бірақ кейін жұмыс қарқынын бәсеңдетіп алдыңыз", - деді Мемлекет басшысы.
Президент Алейсей Цой мен Үкімет мүшелеріне ескерту жасады.
"Сәуір айында сіз (Денсаулық сақтау министріне – автор) жағдайды өзгертуіңіз керек. Бұл талап орындалмаса, кадрлық шешім қабылданады. Ол көңіліңізді қалдыруы мүмкін. Бұл тек Денсаулық сақтау министріне ғана емес, жалпы Үкіметке де қатысты", - деп түйіндеді сөзін Қасым Жомарт Тоқаев.
Дәурен Ерболат
