Қасым-Жомарт Тоқаев үкіметтің алдына шұғыл шешілуі тиіс бірнеше міндет қойды, деп хабарлайды Ақорданың баспасөз қызметі.
"Бірінші. Еңбек нарығының сұранысына сай мамандар даярлау. Төртінші өндірістік революция жаңа мамандықтардың пайда болуына әкеледі. Бүгінде алған білімнің уақыт өткен сайын жарамсыз боп қалуы жиі кездеседі. Үкімет білім беру бағдарламаларының әлемдік стандартқа сай кешенді жаңаруын қамтамасыз ету қажет", – деді Президент.
Қазақстан Президенті осы бағытта алдағы үш жылда алдыңғы қатарлы 180 колледж бен 20 жоғары оқу орнының күшейтілетін айтты. Үкіметке жоғары және кәсіби техникалық білім берудің сапасын бақылау тапсырылды.
Сапалы жұмыс орындарын құру – екінші негізгі міндет.
"Біздегі құрылып жатқан жұмыс орындарының көбі қысқа мерзімге бейімделген. Мұндай әдіспен халықты тиімді жұмыспен қамтамасыз ету мүмкін емес, еңбек нарығын уақытша ғана тұрақтандырады. Сондықтан, біз ең алдымен маман жетіспейтін өңдеу өнеркәсібі, ауыл шаруашылығы, туризм, қызмет көрсету, ақпараттық технологиялар салаларында тұрақты жұмыс орындарын ашуымыз қажет", – деді Мемлекет басшысы.
Үшінші міндет – Жұмыспен қамтудың жаңа қалыптары.
Қасым-Жомарт Тоқаев жаһандық технологиялық трендтер еңбек нарығының кең көлемде трансформациялануына әкелетінін айтты.
"Қазіргі кезде еңбек шарты, кәсіподақ, еңбек демалысы сияқты ұғымдар өзгеріске ұшырауда. Фрилансерлердің, аут-сиафферлердің және басқаларының саны көбеюде. Осыған байланысты нормативтік реттеулерді қайта қарау қажет", – деді Қазақстан Президенті.
Мемлекет басшысы жастарды жұмысқа орналастыруды төртінші негізгі міндет ретінде атап өтті.
"Жоғары оқу орындарды бітірген түлектердің жұмысқа орналасуы 50 пайыздан сәл ғана асады. Біздегі "Жасыл ел", "Дипломмен ауылға", "Серпін", "Жастар – Ел тірегі", "Жастар практикасы" сияқты бағдарламалардың тиімділігін арттыру керек. Олардың қайсы нақты жұмыс істейді, қаншасы жүзеге аспай жатыр? Осыларды қайта қарау қажет. Бұл мәселені ұдайы назарда ұстау керек", – деді Қасым-Жомарт Тоқаев.
Бесінші – инклюзивтілік.
Қазақстан Президенті Үкіметке "Еңбек" мемлекеттік бағдарламасы арқылы мүмкіндігі шектеулі азаматтардың жұмысқа орналасуын қамтамасыз етуді қарастыруды тапсырды.
Қасым-Жомарт Тоқаев еңбек мобильділігін арттыруды алтыншы міндет деп көрсетті.
Үкіметке жүктелген соңғы міндет – гендерлік тең құқықты нығайту. Қасым-Жомарт Тоқаев біртіндеп әйелдердің еңбегін қорғау, олардың мемлекеттік басқарудың барлық деңгейлерінде және корпоративтік салаларға қатысуын қамтамасыз ету шараларын әзірлеу қажеттігін айтты.
