Жеңімпаздар Қазақстан-Британ техникалық университеті және Қ.Жұбанов атындағы Ақтөбе өңірлік университетінде оқуға грант алады, деп жазады inbusiness.kz Оқу-ағарту министрлігінің баспасөз қызметіне сілтеме жасап.
Олимпиаданың үшінші кезеңі бүгіннен бастап 2 желтоқсанға дейінгі аралықта академик Е. А. Бөкетов атындағы Қарағанды университетінде өтеді. Байқауға бұрын республикалық және халықаралық пәндік олимпиадаларға қатыспаған 11 (12) сынып оқушылары қатыса алады.
Оқу-ағарту министрлігі Орта білім комитетінің төрағасы Гүлмира Кәрімованың дерегінше, Олимпиаданың бірінші кезеңіне 3 мыңға жуық оқушы қатысқан. Жалпы балалардың олимпиадаға қатысу көрсеткіші өсіп келеді.
"Олар математика, биология, химия және физика пәндері бойынша жарысқа түсті. Олимпиаданың жеңімпаздары мен жүлдегерлері ҚР Оқу-ағарту министрлігінің I, II және III дәрежелі дипломдарымен марапатталады және гранттарды бөлуде басым құқыққа ие болады. Мысалы, былтыр министрліктің бастамасымен Қазақстанның 20 ЖОО осы олимпиада жеңімпаздарына 50-ге жуық грант бөлді. Министрлікке қарасты "Дарын" орталығының өкілдері жоғары оқу орындарын білім гранттарын бөлу бастамасын қолдауға шақырды. Осылайша, биыл Қазақстан-Британ техникалық университеті жеңімпаздарға 9 грант, Қ. Жұбанов атындағы Ақтөбе өңірлік университеті 5 грант бөлді", - деді Гүлмира Кәрімова.
Олимпиада жүлдегерлері 2 желтоқсанда марапатталады.
