Аймақ басшысы Жеңіс Қасымбек Приозерск тұрғындарымен осы жолғы кездесуде дене шынықтыру-сауықтыру кешені мен мәдениет үйі салынатынына уәде бергендей болды, деп хабарлайды inbusiness.kz.
"Сіздер үш негізгі мәселені көтердіңіздер. ДСК, Мәдениет үйінің құрылысы, стадионды жөндеу. Бұл үш ірі жоба, біз оларды облыстық бюджеттен қолдаймыз. Спорт нысандары бойынша процесс басталды. Мәдениет үйі бойынша да қаржыландыруды толық көлемде қамтамасыз етеміз", – деді Жеңіс Қасымбек.
Қала әкімі Сапар Сатаев ДСК құрылысына конкурс жарияланғанын хабарлады. Мердігерді анықтағаннан кейін жұмыстар басталады, жоба екі жылдық. Мәдениет үйі бойынша жобалық-сметалық құжаттама әзірленеді. Құрылысты келесі жылы бастау жоспарлануда.
Айтуынша, 50 жыл бұрын салынған қалалық стадион толығымен өзгереді. Авариялық мінбелер қайта құрылады. Футбол алаңына жасанды көгал төселіп, тартан жүгіру жолдары жасалады, хоккей корттары, воркаут-алаңдар орнатылады.
