Ресей Президенті Владимир Путин жақын күндері Түркия сапарлап баруы мүмкін, деп хабарлайды inbusiness.kz жергілікті БАҚ-қа сілтеме жасап. Бірақ Ресей басшысының Түркия Президенті Режеп Тайип Ердоғанмен нақты қай күні кездесетіні жарияланбады.
Yeni Şafak газетінің хабарлауынша, Ердоған телефон арқылы Путинді жоғары деңгейдегі іскерлік кездесуге шақырған. Делегация құрамында Ресей Федерациясының Энергетика министрі Александр Новак болады. Өйткені кездесуге түрік экономикалық ведомстволарының басшылары қатысады. Кәсіпкерлер де жиынға шақырылған. Олар Анкараның инвестициялық мүмкіндіктерін бағаламақ.
Ресей президенті наурыз айында Түркия басшысымен телефон арқылы сөйлескен болатын. Олар Украинадағы шиеленісті және оны шешу жолдарын талқылады. 29 наурызда Ыстамбұлда Украина мен Ресейдің екіжақты келіссөздері өтті.
Табиғат Нұрболат
