Оның сөзінше, отандық вакцина клиникалық зерттеудің үшінші кезеңінен өтті.
"9 шілде күні соңғы талдау нәтижесі алынды. Шілденің соңына дейін талдау нәтижесі тағы бір өңделіп, мәліметтердің статистикасы жасалды. Бұл жұмысқа 3 мың адам қатысты. Шілденің соңында клиникалық зерттеудің қорытынды есебі әзірленді. Қазіргі күні қорытынды есеп дәрілік заттар мен медициналық бұйымдарды сараптау ұлттық орталығының сараптауынан өтіп жатыр", – деді бас директор.
Күнсұлу Закарьяның мәлімдеуінше, болашақта QazVac вакцинасы туралы танымал журналдарға мақала жарияланады.
"QazVac-тың үшінші кезеңі бойынша барлық клиникалық зерттеу есебін дәрілік заттар мен медициналық бұйымдарды сараптау ұлттық орталығы мақұлдаған жағдайда біз қазақстандық вакцина туралы көпке танымал журналдарға мақала жариялаймыз. Мақсат – отандық ғылымның жетістігін дәріптеу. Әзірге қандай журнал және мақаланың қай уақытта жарияланатыны белгісіз", – деді отандық вакцинаның авторы.
Қанат Махамбет
