Ресейде науқастардың қан плазмасының негізінде жасалған "КОВИД-глобулин" деп аталатын препарат клиникалық сынақтан өтіп, Денсаулық сақтау министрлігінің мақұлдауына ие болды, деп хабарлайды Inbusiness.kz.
"Ростехтің" баспасөз қызметі бұл дәрінің коронавирусты бейтараптандыруда тиімді және қауіпсіз екенін мәлім етті. Дәрі-дәрмектің құрамында SARS-CoV-2-ге қарсы антиденелер бар. Ол ағзаға енгізілгенде аурудың асқынуына жол бермейді.
"КОВИД-глобулин" өндірісі үшін антиденелерінің титрі жоғары донорлардың плазмасы қолданылады. Препараттың тазарту және вирус қауіпсіздігі деңгейі жоғары", – деді "Нацимбио" бас директоры Андрей Загорский.
Бұған дейін Дүниежүзілік денсаулық сақтау ұйымы коронавирусты емдеу барысында науқастардың қан плазмасын қолданбауды ұсынған еді.
Ұйымның айтуынша, мұндай әдістің тиімділігі төмен және дәлелдебеген. Сондай-ақ плазма құю аурудың асқынуын тежемейтін көрінеді.
Табиғат Нұрболат
