Мәскеуде Ресейде тұратын 14 жастан 24 жас аралығындағы отандастарымыздың арасында қазақ тілі, мәдениеті және Қазақстан тарихынан олимпиада мәресіне жетті. Бұл туралы Қазақстанның РФ-дағы Елшілігіне сілтеме жасап strategy2050.kz хабарлайды.
Интеллектуалдық сайысты Қазақстан Республикасы Тәуелсіздігінің 25 жылдығын және Қазақстан халықтарының тілдері күнін тойлау аясында Ресей аймақтарында қазақ ұлттық-мәдени бірлестіктерінің қолдауымен ҚР-ның РФ-дағы Елшілігі мен консулдық мекемелері ұйымдастырды.
Елшілікте атап өткендей, олимпиаданың басты мақсаты Ресейдегі қазақ жастарының қазақ тілін үйренуге қызығушылығын арттыру және Қазақстанның тарихы мен мәдениетіне құрметпен қарауды қалыптастыру болып табылады.
Мәскеу Мемлекеттік лингвистикалық университетінің (ММЛУ) ғимаратында өткен байқау қатысушыларына жазбаша және ауызша тапсырмалар берілді.
Сайыста тиісті 128 балдың 100-ін жинаған Мәскеу қалалық педагогикалық университетінің студенті Инесса Куанова жеңімпаз атанды.
Іс-шара "Шабыт" қазақстандық студенттердің этно-музыкалық тобының шағын концертімен аяқталды.
