Қазақстан қазіргі кезде COVID-19 індетіне қарсы ресейлік вакцинаны сатып алу туралы келіссөздер жүргізіп жатқан жоқ. Бұл туралы Денсаулық сақтау министрлігінің ресми өкілі Бағдат Қожахметов мәлім етті.
"Мен Ресейдің әзірлеген вакцинасы жайлы ештеңе айта алмаймын. Дегенмен, әлемде коронавируске қарсы вакцина ретінде әзірленген дәрі-дәрмектің жоқ екеніне еліміздің Денсаулық сақтау министрлігінің сарапшылары сенімді деп айта аламын. Білуімше, әлемдегі ең үздік зертханалар қазіргі кезде өнімді әзірлеудің үшінші сатысына жетті. Ал алда әлі ешкім өтпеген төртінші кезең бар. Егер Қазақстан екпені елден тыс жерлерден сатып алатын болса, тек халықаралық сертификаттаудан өткен вакциналарды ғана алады", – деді Бағдат Қожахметов.
"Интерфакс-Қазақстан" агенттігінің хабарлауынша, Н.Ф. Гамалея атындағы Ұлттық эпидемиология және микробиология ғылыми орталығы мен "Ресейдің тікелей инвестициялар" қоры бірлесе әзірлеген коронавирус індетінің алдын-алуға арналған әлемдегі алғашқы вакцинаны 11 тамыз күні Ресейдің Денсаулық сақтау министрлігі тіркеген. Вакцина "Спутник V" деген атауға ие болған.
