Ресейдің Алматыдағы Бас консулы Евгений Бобров Украинадағы жағдай Ресей мен Қазақстан арасындағы мәдени-гуманитарлық ынтымақтастыққа әсер еткенін айтты.
Ол ресейлік орындаушылардың концерттері мен Қазақстандағы басқа да іс-шаралар батыс қаржыландыратын республикадағы үкіметтік емес ұйымдардың (ҮЕҰ) әрекеттеріне байланысты тоқтатылатынын түсіндірді, деп жазады Inbusiness.kz.
"Әрине, Украинадағы жағдай Ресей мен Қазақстан арасындағы мәдени-гуманитарлық ынтымақтастыққа сызат түсірді. Өкінішке орай, біздің күштеріміз бен іс-әрекеттерімізді біріктіру жағына бара жатқан жоқпыз. Батыс қаржыландыратын ҮЕҰ-ның ұсынуымен ресейлік орындаушылар мен ұжымдардың концерттері тоқтатылады, кейбір акциялар мен жобаларды өткізуге тыйым салынады",— деді Бобров мырза ТАСС-қа берген сұхбатында.
Бұл ретте Евгений Бобров көктемде Қазақстанда ресейлік ұжымдардың, атап айтқанда Борис Эйфман балет театрының гастрольдері, Этери Тутберидзенің мұз шоуы және ГИТИС режиссерлік факультетінің қойылымдары сәтті өткеніне назар аударды.
