Биылғы қаңтар-тамыз айларының қорытындысына сәйкес, Қазақстандағы жиһаз өндірісі 51,7 млрд теңге болды. Бұл былтырғыға қарағанда құндық мәнде 25,2%-ға артық, деп жазады inbusiness.kz www.energyprom.kz порталына сілтеме жасап.
Республика бойынша жиһаз шығарылымының ең көп көлемі Алматыға тиесілі: 13,7 млрд теңге, бір жылда +14%. Үздік үштік қатарында Қарағанды (4,9 млрд тг, +57,9%) және Алматы (4,7 млрд тг, +58%) облыстары бар.
Бірінші жартыжылдық қорытындысы бойынша жергілікті компаниялар металл орындықтар мен отыруға арналған өзге де жиһаздарға деген сұранысты (ішкі нарықта сатуды және экспортты) 32,6%-ға, ағаш орындықтарға – небәрі 13,3%-ға, отыруға арналған басқа жиһаздарға 2,1%-ға қамтамасыз еткен.
Отандық өндірушілер кеңселерге арналған ағаш жиһазына деген сұранысты 77,3%-ға қамтамасыз етті; сауда кәсіпорындары үшін жиһаз сегментінде көрсеткіш – 67,5%, ас үй жиһазы – 63%, матрацтар – 56,9%. Асханалар мен қонақ бөлмелерге арналған ағаш жиһаз үшін сұраныс тек 13,3%-ға ғана қамтылды.
- Ресурстың жазуынша, елдің жиһаз саласында өзін-өзі толық қамтуы туралы айту әлі ерте.
- Тамыз айының қорытындысы бойынша жиһаз және тұрмыстық заттар бір жылда 19,2%-ға қымбаттады.
- Бағаның қымбаттауын Шығыс Қазақстан (33,1%), Ақмола (31,1%), Қарағанды (29,6%), Алматы (26,6%) және Қостанай (25,9%) облыстарының тұрғындары қатты сезінген.
- Бағаның ең төмен жылдық өсімі Маңғыстау облысында – 4,3%.
