Мемлекеттік бюджеттің атқарылу барысын баяндаған министр 8 айда шығысқа бағытталған 9,9 трлн теңгенің 7 млрд теңгесі үнемделгенін жариялады.
"Республикалық бюджет бойынша 9,9 трлн теңгеге шығыс жүргізілді. Атқарылмау деңгейі 31 млрд теңгені құрады. Оның ішінде 7 млрд теңге үнемдеу, 24 млрд теңге игермеу болып тіркелді", – деді министр.
Ерұлан Жамаубаевтың сөзінше, денсаулық сақтау, ішкі істер, мәдениет және спорт, әділет, төтенше жағдайлар министрліктері қаржыны қажетінше жаратпаған. Бұған төлем негізділігін растайтын құжат ұсынбау, орындалған жұмыс актілерін, шот- фактураларды дер кезінде ұсынбау сияқты жайттар себеп болған.
"Жергілікті бюджет шығысы 5,2 трлн теңгені құрады. Бұл жерде 64 млрд теңге игерілмеген. Биыл өңірлерге 2,5 трлн теңге көлемінде нысаналы трансферт көзделген. 1 қыркүйектегі жағдай бойынша, оларға 1 трлн 358 млрд теңге бөлінді. Оның 98%-ы игерілді. Игерілмеген 26,5 млрд теңгенің 3 млрд теңгесі үнемделді. Ең көп игерілмеген қаржы Нұр-Сұлтан, Алматы қалалары мен Батыс Қазақстан, Қызылорда, Түркістан облыстарында қалыптасты", – деді Ерұлан Жамаубаев.
Қанат Махамбет
