26 маусым күні Ресей Федерациясының ұлттық павильонында ерекше есте қалатын оқиға болды. Бұл күні павильонға арнайы қойылған камера 100 мыңыншы көрерменнің келгенін тіркеді. 100 мыңыншы қонақты павильонның қызметкерлері, волонтерлер мен гидтер үлкен құрметпен, ду қол шапалақтап қарсы алды, деп хабарлайды egemen.kz.
Ерекше атап өтетін бір мәселе, 100 мыңыншы көрермен құрметіне ие болған – маңғыстаулық жас жұбайлар Күмісай мен Лиридо екен. Астанадағы жаһандық көрмеге Ақтаудан арнайы келген жас жұбайлар жақында ғана отау құрған. Күмісай Астанада оқуда жүріп, осында қызмет атқаратын Албания азаматы Лиридомен тұрмыс құрған көрінеді.
Ресей павильонының директоры Юлия Лопарева 100 мыңыншы қонақтарға құрмет көрсетіп, ескерткіш сыйлықтар тапсырды. Сонымен бірге, Күмісай мен Лиридо ЭКСПО-2017 көрмесі аясында өткізілетін мәдени шаралар бағдарламасы негізінде 5 шілде күні өтетін Полина Гагарина мен Егор Криданың концертіне екі тегін билетке ие болды.
"Біз елден келгеннен кейін бірінші кезекте ЭКСПО-2017 көрмесін аралауды жоспарлаған едік. Бүгін сол жоспарымыз орындалды. Көрмеге келген сапарымыз осындай, есте қалатындай әсерлі болады деп ойлаған да жоқ едік. ЭКСПО-дан алған әсерімізбен қоса, үлкен құрметке бөлендік. Біз аралаған павильондардағы жаңғырмалы энергия тақырыбындағы жәдігерлер шынымен көңілден шықты. Енді осы озық идеялар мен жаңа технологияларды еліміздің энергетикасын дамытуға кеңінен пайдалана білсек, нұр үстіне нұр болар еді", - дейді Күмісай.
