Оқу-ағарту вице-министрі Еділ Оспан Риддердегі мектепке қатысты пікір білдірді, деп хабарлайды inbusiness.kz сайты.
Тілшілер ведомство өкілінен "Риддердегі қазақ мектебінің жобалық-сметалық құжаты бар ма? Жеке мектеп салына ма?" деп сұрады.
"Бұл мектептің жағдайы бойынша біраз мәселе көтерілді. Бұған дейін де өз пікірімізді айтқан болатынбыз. Бірінші мәселе – мектептің тілін айқындау. Әкімдік жергілікті тұрғындардың талап-тілектері негізінде қай тілде оқытатын мектеп болатынын шешуі керек. Риддер тұрғындары тарапынан осындай сұраныстар болды. Қазіргі жобаланып, салынып жатқан мектептердің бірін ШҚО әкімдігі тұрғындардың талап-тілектерін ескеріп, қазақ тіліне беру керек деп ойлаймыз. Биыл Риддерде 600 орындық мектептің құрылысы басталды. Ғимарат келесі жылдың соңына дейін қолданысқа берілуі тиіс. Бұл қазақ мектебі болуы керек деп ойлаймыз", - деді вице-министр.
Еділ Оспан жаңадан салынып жатқан мектептің қай тілде оқытатыны бойынша шешімді жергілікті әкімдік қабылдайтынын жеткізді.
Айта кету керек, осыған дейін Риддердегі жалғыз қазақ мектебі туралы жазған болатынбыз.
