Бұл туралы Шығыс Қазақстан облысының әкімі Ермек Көшербаев хабарлады, деп жазады inbusiness.kz.
"Бүгінгі таңдағы басты жаңалықтың бірі – Риддер ЖЭО-ның "Водоканал" мемлекеттік коммуналдық кәсіпорнына сенімгерлік басқаруға ауысуы. Сонымен қатар станцияны мемлекеттік меншікке беру жұмыстары қатар жүргізілуде. Бұл жұмыс шамамен 2 айға созылады. Жөндеу жұмыстарынан басқа қажетті мамандар жұмысқа қабылданып жатыр", - деді ШҚО әкімі Ермек Көшербаев.
Аймақ басшысы ЖЭО-ның қысқы мерзімге дайындығы 80 пайызды құрайтынын жеткізді. Бұдан бөлек алдағы уақытта 3 қазандықта гидравликалық сынақтар басталатынын, қала үйлеріне ыстық су қыркүйек айының соңында берілетінін айтты.
Әкімдік мәліметінше, бұл үш қазандықтың қуаты қаланы жылытуға, сыртқы температура режимі -10 болған кезде жеткілікті болады.
Барлық алты қазандық 15 қарашаға дейін іске қосылады.
