Маңғыстау облысы әкімдігінің чатында Мұнайлы ауданына қарасты №10 мектеп мұғалімдерінің бейнеүндеуі пайда болды. Мұғалімдер оқу орнының директорын әріптестерін келген өнерпаздардың концертіне билет сатып алуға мәжбүрледі деп айыптап отыр, деп жазады inbusiness.kz сайты.
Ұстаздар ел Президенті Қасым-Жомарт Тоқаевқа және білім министріне видеоүндеу жолдады. Үндеуде мұғалімдерге мектеп басшысы тарапынан қысым жасалып жатқаны, директордың өз өкілеттігін асыра пайдаланып, гастрольдік өнерпаздардың концертіне билет сатып алуға мәжбүрлеп жатқаны айтылған.
"Біз Мұнайлы аудандық білім бөлімінің басшысына және прокуратурасына, сондай-ақ Білім министрлігіне хабарластық. Алайда біздің ұжымдық хатымыз қанағаттандырылмады. Осыған байланысты сізге жүгінуге мәжбүрміз", – дейді ұстаздар видеода.
Мұнайлы ауданындағы №10 мектеп директоры өзіне тағылған айыптардың барлығын жоққа шығарады. Ол ұстаздарға баруды ұсынған жалғыз концерт еліміздің Халық әртісі Роза Рымбаеваның концерті екенін және олардың ауданында мүлдем тегін өткенін айтады.
"№57 бұйрықпен конкурс бойынша мен Мұнайлы ауданы Батыр ауылының №10 мектебінің директоры болып тағайындалдым. Тағайындалған күннен бастап өз міндеттерімді адал атқарамын. Мұғалімдердің құжаттарын тексеру кезінде мен орта арнайы білімі бар мұғалімдердің жоғары білім деңгейіне сәйкес жалақы алатындығын білдім. Билеттерге келетін болсақ, наурыз қарсаңында ауданымызға Роза Рымбаева келді. Мен мұғалімдерден сол жерге баруды өтіндім. Бірақ бұл тегін қойылым болды. Оларды ешкім күштеп апарған жоқ. Оларға ешқандай қысым жасамаймын. Барлығы тек нормалар мен заңға сәйкес. Керісінше, олар маған жұмысты орындауға кедергі келтіруде", - деді мектеп директоры Күмісай Қансұлтанқызы.
