Шымкентте айы-күні жақындаған жүкті әйел оқ жарақатымен ауруханаға түсті, деп хабарлайды inbusiness.kz сайты.
39-40 аптадағы әйел жедел жәрдеммен қалалық клиникалық ауруханаға жеткізілген. Дәрігерлер оның кеуде қуысы жараланып, ішіне қан кеткенін анықтаған.
Қалалық клиникалық аурухананың мәліметінше, оқ әйелдің оң жақ өкпесін, диафрагма және бауырын жарақаттаған.
– Әйелдің жағдайы өте ауыр болғандықтан, хирургтер, торакалды хирургтер, акушер-гинекологтар мен реаниматологтар шұғыл консилиум өткізіп, әйелге алдымен кесарь тілігін жасаған. Сәби аман-есен туды. Одан кейін хирургтер әйелдің кеуде және іш қуысына бірнеше күрделі операция жасап, зақымданған ағзаларын тіккен. Қазір науқас жансақтау бөлімінде, ем оң нәтижесін беріп жатыр, – деп жазады қалалық клиника.
