2020 жылдың қаңтар-қыркүйегінде сақтандыру компанияларының кірісі 428,6 млрд теңгеге жетті. Бұл өткен жылдың осы кезеңімен салыстырғанда 24,6%-ға жоғары. Саладағы көрсеткіштер төрт жыл қатарынан өсіп келеді, деп хабарлады finprom.kz.
Сектордағы кірістердің басым бөлігі сақтандыру қызметіне тиесілі. Оның көлемі 322,1 млрд теңгеге тең. 2019 жылдың сәйкес кезеңінен 13,6%-ға жоғары. Одан кейінгі орында 104,8 млрд теңге көрсеткішімен инвестициялық саладан түскен қаржы. Бұл да өткен жылмен салыстырғанда 81,2%-ға жоғары.
Алайда сақтандыру компанияларының шығыны да жылдан жылға артып келеді. Биыл оның көлемі 17,3%-ға немесе ақшаға шаққанда 317,9 млрд теңгеге жетті.
Нәтижесінде 2020 жылдың қаңтар-қыркүйегінде сақтандыру компанияларының табысы 110,7 млрд теңгені құрады. Бұл – 2015 жылдан бері ең жоғары көрсеткіш. Сектордың табысы бір жылда 51,9%-ға артқан.
Ал корпоративтік табыс салығының көлемі бір жылда 8%-ға немесе 8,7 млрд теңгеге өсті. Осылайша салық төлегеннен кейінгі компаниялардың таза табысы 102 млрд теңгені құрады.
Құралай Құдайберген
