Дария арнасы ұдайы бақылауға алынған. Бұл туралы бүгін өңірлік коммуникациялар қызметінде өткен баспасөз конференциясында облыстық жұмылдыру дайындығы басқармасының басшысы Серік Сермағанбетов мәлімдеді, деп хабарлайды Қызылорда облысы әкімінің баспасөз қызметі.
"Бүгінде елді мекендер мен стратегиялық маңызы бар нысандардың айналасындағы ахуал тұрақты. Жағдай қатаң бақылауға алынған. Облыс аумағына жоғарыдан келіп түсіп жатқан су көлемі секундына 640 текше метрді құрауда. Қызылорда су торабына дейін су таратушы каналдар арқылы 110 текше метр су алынса, тораптан төменге секундына 530 текше метр су өтуде. Арал, Қазалы, Қармақшы, Жалағаш, Сырдария аудандарында мұз толықтай ұстасса, Шиелі, Жаңақорған аудандарында өзен беті таза", - деді облыстық жұмылдыру дайындығы басқармасының басшысы Серік Сермағанбетов.
Сонымен қатар, қала әкімінің орынбасары Асылбек Шәменовтің айтуынша, облыста су тасқынына қарсы жұмыстарға пайдаланылатын материалдық-техникалық қор, қажетті материал жасақталған. Мұз жару жұмыстарын жүргізуге арнайы мамандандырылған мекемемен алдын ала келісім жасалынған.
"Сондай-ақ, айта кету керек, саяжайлар мен елдімекендер тұсында жерасты суы көтеріліп жатыр. Бұл табиғи процесс. Қалыпты жағдай. Жылда қайталанады", - деді "Қазсушар" өндірістік учаскесінің басшысы Жорабек Нұрымбетов.
Жалпы, су тасқыны жағдайының алдын алу мақсатында 2016-2017 жылдары Сырдария өзенінің қорғаныс бөгетінің 96 қауіпті учаскесі анықталып, бүгінде ол жерлерде толықтай жұмыс жүргізілді.
