"Самұрық-Қазына" АҚ ресей рублімен қаржы тарту мүмкіндігін қарастырмайды. Бұл туралы онлайн брифинг барысында акционерлік қоғамның экономика және қаржы жөніндегі басқарушы директоры Нәзира Нұрбаева мәлім етті, деп хабарлайды inbusiness.kz.
Оның айтуынша, бұрын рубльмен қаржыландыру қор компаниялары үшін тиімді болды.
"Валютада несие алған компаниялар валюталық тәуекелдерді азайту үшін көбінесе рубльмен қайта қаржыландырылды. Бірақ қазір жағдай өзгерді. Рубльмен қаржыландыру құны өзгерді, ресейлік банктерге қарсы санкциялық тәуекелдер айтарлықтай өсті, сондықтан рубльмен қаржыландыру енді қарастырылмайды", – деді Нәзира Нұрбаева.
Еске сала кетсек, жыл басында Қазақстан Президенті Қасым-Жомарт Тоқаев "Самұрық-Қазына" АҚ-ның сатып алу тәртібін қайта қарауды тапсырған болатын. Бұдан кейін Мемлекет басшысы процестің ашықтығына қатысты шағымдардың жүйелілігін атап өтті.
Құралай Құдайберген
