Денсаулық сақтау министрі Алексей Цойдың сөзінше, қызметкерлердің жалақысы аз, ал жас мамандарға жағдай жасалмайды, деп хабарлайды inbusiness.kz.
Министрдің мәлімдеуінше, санитарлық-эпидемиологиялық қызмет бірнеше рет қайта құрылғандықтан, цифрлық технология жағынан да көш соңында келеді.
"Өзіміздің ақпараттық жүйеміздің болмауы, компьютерлік техниканың әлсіздігі және байланыс сапасының төмендігі сынды мәселелер өзекті болып тұр", – деді Алексей Цой мәжілісте өткен үкімет сағатында.
Министр кадрлардың тапшылығы мәселесін шешу үшін 200 мемлекеттік грант бөлінгенін баяндады.
"2020-2021 жаңа оқу жылынан бастап санитарлық гигиена мамандығы бойынша шәкірт тәрбиеленетін болды. Бұл үшін бакалаврға – 150, магистратураға – 50 грант бөлінді. Биыл денсаулық сақтау министрлігі оқу мерзімін қайта қарап, оны 4 жылдан 5 жылға ұзартуды ұсынды", – деді Алексей Цой.
Министрдің айтуынша, 2025 жылға дейін мемлекеттік грант саны 400-ге жеткізіледі.
Қанат Махамбет
