Қорғаныс министрінің орынбасары генерал-майор Шайх-Хасан Жазықбаев 2025 жылдың 1 қаңтарынан бастап білім беру жеңілдіктерін алу жөнінде жаңа талаптар енгізілетінін мәлімдеді.
Екі бейіндік пән бойынша тестілеу қосылады. Бұдан өзге мемлекеттік грант берілген сарбаздар шәкіртақы алады. Оған қоса, алғашқы оқу жылы студенттер жатақханасына орналастыруға басымдық беріледі.
"2023 жылы күзде әскерге шақырылған мерзімді қызметтің 17 927 сарбазы тегін оқуға бір жарым мың орынды бөлу рәсіміне қатысты. Конкурсқа Қорғаныс министрлігінен – 8 169, Ұлттық ұланнан – 6 441, ТЖМ – 315, Шекара қызметінен – 2 715, Мемлекеттік күзет қызметінен – 287 сарбаз қатысты", - деп жазылған хабарламада.
Іріктеудің ашықтығын "Срочники 2.0" ақпараттық жүйесі қамтамасыз етті, онда күш құрылымдарының 161 әскери бөлімі қызметтің барлық кезеңінде сарбаздардың үлгерімі мен тәртібі бойынша нәтижелер енгізді.
Әрбір әскери қызметшіге үш жоғары оқу орнын таңдауға болады. Олардың арасында жастардың ең үлкен қызығушылығын тудырған Әл-Фараби атындағы Қазақ ұлттық университеті, NARXOZ, Astana IT University, Л. Н. Гумилев атындағы Еуразия ұлттық университеті, М.Әуезов атындағы Оңтүстік Қазақстан университеті болды.
Әскери жоғары оқу орындарына түсуге 1031 сарбаз өтініш берді. Бөлу рәсімі әскери қызметшілердің рейтингіне қарай күш құрылымдарының үш базасы бойынша автоматты түрде іске асырылды.
Әскерде болған сарбаздар үшін тағы бір артықшылық бар. Студенттің қалауымен ол запастағы офицер бағдарламасы бойынша әскери кафедраға конкурссыз қабылданады, яғни онда ол тегін оқи алады. Бүгінгі таңда әскери кәсіпті таңдаған 20-дан аса адам әскери кафедраға түсті.
