Энергетика вице-министрі Мұрат Жүребеков "Сарыарқа" магистральді газ құбырының Нұр-Сұлтан қаласына дейінгі құрылысы аяқталуға жақын екенін мәлімдеді.
"Сарыарқа" магистральді газ құбырының алғашқы кезеңіндегі төсеу жұмыстары 100 пайыз аяқталды. Бүгінге дейін 1 061 шақырым құбыр төселіп, дәнекерленді. Құрылыс жұмысына 1 700 маман мен 1 мың арнайы техника жұмылдырылды. 963 шақырым немесе газ құбырының 91%-ы сынақтан өтті", – деді вице-министр.
Мұрат Жүребековтің сөзінше, "Сарыарқа" магистральді газ құбырының Нұр-Сұлтан қаласына дейінгі құрылысы жоспарға сай, межелі мерзімде аяқталады.
"Қазір газ құбырының, 5 автоматтандырылған газ тарату стансасының, газ өлшеу стансасының және басқару бекетінің құрылысы жүріп жатыр. Барлық нысандағы құрылыс желтоқсан айында аяқталады. Газ құбыры 31-желтоқсан күні қабылданады. Нұр-Сұлтан қаласына дейінгі магистральді газ құбырының құрылысы жол бойындағы 171 елдімекенді кезең-кезеңмен көгілдір отынмен қамтуға сонымен қатар елорданың және өзге де елдімекендердің экологиялық жағдайын жақсартуға мүмкіндік береді", – деді вице-министр.
Қанат Махамбет
