Сарышаған полигонында "Батыл тойтарыс – 2026" стратегиялық командалық-штабтық оқу-жаттығуы аясында Әуе шабуылына қарсы қорғаныс әскерлері мен Әскери-әуе күштерінің "Ашық аспан – 2026" бірлескен оқу-жаттығуы өтті, деп хабарлайды inbusiness.kz сайты.
Оқу-жаттығудың негізгі мақсаты – әскери басқару органдары мен бөлімшелердің әуе шабуылы құралдарының жаппай соққыларына тойтарыс беруге әзірлігін тексеру.
Әскери қызметшілер авиация, Әуе шабуылына қарсы қорғаныс және радиоэлектрондық күрес бөлімшелерінің өзара іс-қимылын, жедел маневр жасауды және атыс міндеттерін орындағаннан кейін позицияларды ауыстыруды пысықтады.
Жаттығу барысында ұшқышсыз ұшу аппараттарына қарсы іс-қимылға және Әуе шабуылына қарсы қорғаныстың эшелонды жүйесін қолдануға ерекше назар аударылды. Бөлімшелер сыртқы нысананы көздеу құралдарын пайдалану және атыс құралдарын жасырын орналастыру тәсілдерін де сынақтан өткізді.
Практикалық кезеңде С-75 зениттік-зымыран кешені қолданылып, радиолокациялық және радиоэлектрондық күрес құралдары бірыңғай ақпараттық-барлау кеңістігіне біріктірілді.
Сонымен қатар С-300ПС кешені алғаш рет жердегі нысананы жою үшін қолданылып, белгіленген нысана сәтті жойылды.
– Біз бөлімшелердің әуе жағдайы жылдам өзгеретін кезде үйлесімді әрекет ету қабілетін тексердік. Авиация, Әуе шабуылына қарсы қорғаныс және радиоэлектрондық күрес күштерінің өзара іс-қимылын пысықтадық. Алға қойылған міндеттер толық көлемде орындалды, – деп атап өтті Әуе шабуылына қарсы қорғаныс әскерлерінің қолбасшысы полковник Әділ Сүбебаев.
Оқу-жаттығу кезінде жасанды интеллект элементтері бар автоматтандырылған басқару жүйелері де сынақтан өткізілді. Жаттығу қорытындысында әскери бөлімшелердің әуе жағдайы өзгерген кездегі іс-қимыл дайындығына баға берілді.
