Сауд Арабиясының СІМ басшысы Корольдіктегі мұнай өндірісінің қысқару себебін атады. Корольдіктің СІМ басшысы Адель әл-Джубейрдің айтуынша, АҚШ-тағы бензиннің жоғары бағасы Сауд Арабиясының кінәсінен емес, АҚШ-тағы мұнай өңдеу зауыттарының жетіспеушілігінің салдарынан туындап отыр, деп жазады inbusiness.kz “РИА Новости” сайтына сілтеме жасап.
"Ондаған жылдар бойы мұнай өңдеу зауыттары салынбағандықтан, сіздерде қайта өңдеу тапшылығы мәселесі туындап отыр", - деді ол Fox News-ке берген сұхбатында.
Адель әл-Джубейр өз сөзінде Сауд Арабиясында АҚШ-қа зиян келтіру мақсаты болмағандығын атап өтті.
ОПЕК+ елдері осы аптада қараша айынан бастап мұнай өндіруді тәулігіне 2 миллион баррельге қысқартуға келісті. Санақ базасы ретінде тамыз айына келісілген өндіріс деңгейлері алынады.
АҚШ президенті Джо Байденнің мұндай шешімге көңілі толмады. Ол ОПЕК-тің энергия бағасын бақылауды төмендетудің қосымша құралдары мен мүмкіндіктері туралы Конгреспен кеңес өткізуге уәде берді.
