Бұл туралы Өңірлік коммуникациялар қызметінде өткен брифингте Алматы қаласы Кәсіпкерлік және инвестициялар басқармасының басшысы Еркебұлан Оразалин айтты.
Басқарма басшысының сөзінше, сауда саласында да оң динамика байқалады. Егер соңғы айлардағы көрсеткіштерді салыстыратын болсақ, бөлшек және көтерме тауар айналымының көлемі 90% -дан асты және бұрынғы деңгейге жақындаған.
"Жалпы бұл қанағаттанарлық көрсеткіш емес, өйткені республикадағы сауданың 50% -ын біздің тауар айналымымыз қалыптастырады. Осыған байланысты мемлекеттік қолдау шаралары бойынша ауқымды жұмыстар жүргізілуде. Сондай-ақ біз азық-түлік өндірушілерден бастап техникалық және құрылыс өнімдерін сатушыларға дейінгі ірі кәсіпкерлермен байланыстамыз, олар бізге белгілі бір өнімге халықтың сұранысы мен қызығушылығы туралы хабарлайды. Осы тұрғыдан алғанда, біздің осы компаниялармен бірлескен тікелей жұмысымыз мемлекеттік бағдарламалардың тетіктерін пайдалана отырып, қалыптасқан жағдайды түзету болып табылады",– деді Еркебұлан Оразалин.
Алматы қаласында сауда және қызмет көрсету сегменті шаhар экономикасына негізгі табыс әкелетін сала болып табылады. Осыған байланысты 2015 жылы "Даму" КДҚ" АҚ-мен бірлесіп, сауда, сұлулық салондарының, спа, хостелдердің және басқа да салалардың жұмысы саласында қызметті жүзеге асыратын кәсіпкерлерді қолдауға бағытталған "Almaty Business" өңірлік бағдарламасы әзірленді.
"Қазір көптеген Мемлекеттік бағдарламалар бойынша өзгерістер енгізілуде. Мысалы, егер бұрын мемлекеттік бағдарламалар негізінен өндіріс саласын қамтыса, қазір сауда және қызмет көрсету саласындағы компаниялар осы қаржылық мүмкіндіктерге қол жеткізе алады. Жалпы бизнесті дамыту бағдарламасы бойынша биыл 7,8 млрд теңге бөлінді, оның 6 млрд теңгесі нақты жобаларға бағытталды", – деді ол.
Жалпы қаланың республикалық көлемдегі бөлшек тауар айналымының үлесі 30,4%-ды, көтерме сауда айналымының үлесі 42,8%-ды құрады.
Құралай Құдайберген
