Павлодар облысында сәуір айында үйінен шығып, содан бері хабарсыз кеткен 30 жастағы ер адам табылды, деп хабарлайды inbusiness.kz сайты.
Бұл туралы облыстық Полиция департаменті мәлім етті.
Шілде айында полицияға ер адамның анасы хабарласып, ұлының сәуірден бері үйіне оралмағанын және байланысқа шықпағанын айтқан.
Жедел-іздестіру іс-шаралары барысында полицейлер ер адамның Қарағанды облысы Саран қаласының маңындағы дала аумағында жүргенін анықтады.
Белгілі болғандай, павлодарлық табыс табу үшін жұмысқа кеткен. Алайда жолда ұялы телефонын жоғалтып алған. Жаңа телефон сатып алуға қаражаты болмағандықтан, жақындарымен байланыса алмаған.
Полиция мәліметінше, ер адамға қатысты ешқандай қылмыс немесе құқық бұзушылық жасалмаған.
Полиция тұрғындарға тұрғылықты немесе уақытша тұратын жерінен ұзақ уақытқа кететін болса, бұл туралы туыстары мен жақындарына алдын ала хабарлауды ескертті.
