Қазақстандық тараптың өтініші бойынша бүгін түнде Қытайдың Ухань қаласынан Ресей мен Өзбекстанның арнайы борттарымен біздің тағы 8 азаматымыз қауіпсіз жерге көшірілді, деп хабарлады СІМ баспасөз қызметі.
Таратылған хабарламадан білгеніміздей, бес азаматымыз Ташкент қаласында екі апталық дәрігерлердің бақылауында, ал қалған үшеуі Түмен қаласында қадағалауда болады.
"Сондай-ақ, эвакуацияланғандар арасында осыған дейін ҚХР-ның эпидемиологиялық қызметтерімен дене қызуы салдарынан шығарылмаған Яньцзы Университетінің 1-курс студенті бар",– делінген хабарламада.
Отырғызу алдында ҚР азаматтары қосымша медициналық тексеруден өткен. Дене қызуы немесе коронавирус симптомдары анықталмаған.
Еске сала кетсек, 3 ақпан күні еліміздің 83 азаматы Уханьнан әкелінген болатын.
