Семейдегі қалалық автопарктердің бірі 50 жаңа автобуспен толықты, деп хабарлайды ҚазАқпарат Семей ақпарат орталығына сілтеме жасап.
Көлік реформасын жүзеге асыру аясында қаладағы қоғамдық көлікті жаңарту ісі жалғасып жатыр. Бүгін ыңғайлы әрі жайлы қоғамдық көліктің 18-і жолға шықты. Тағы 11 автобус соңғы дайындық кезеңінен өтуде.
Жаңа автобустар 18 орынға есептелген. Олар 25, 28, 39-бағыттар бойынша, жалпы 14 бағытта тұрғындарға қызмет көрсетеді. Сонымен қатар, аязды күндері жолаушылар жайлылығы үшін көліктерде қосымша пештер орнатылмақ. Жыл соңына дейін "Таксомотор паркі" ЖШС тағы 30 автобус сатып алуды жоспарлап отыр.
"Семей қаласының әкімі Ермак Сәлімов қала тұрғындары мен қонақтарына қолайлы болуы үшін автобус парктерін жаңарту қажеттігін бірнеше рет атап өткен болатын. Бір автобустың құны – 10 миллион теңгеден асады. Барлық автобус жергілікті "СемАз" автоқұрастыру зауытынан сатып алынды", – дейді "Таксомотор паркі" ЖШС атқарушы директоры Владимир Халин.
