Былтыр жазда болған алапат өртке байланысты Мемлекет басшысы құқық қорғау органдарына орманды заңсыз кесуге және ағаштарды ұрлауға қарсы күрес шараларын күшейтуді тапсырды. ІІМ бұл тапсырманы орындау аясында осы саладағы қылмыстық схемаларды анықтау және жолын кесу бойынша жүйелі жұмыс жүргізіп келеді, деп хабарлайды inbusiness.kz сайты Polisia.kz-ке сілтеме жасап.
"9 шілдеде Абай облысының аумағында ІІМ және ҰҚК жедел уәкілдері прокуратураның үйлестіруімен "Семей орманы" мемлекеттік орман табиғи резерваты филиалдарының бірінің директорының басшылығымен әрекет еткен қылмыстық топтың қызметіне тосқауыл қойды. Орманды жымқырды деген күдікпен полицияға 20-дан астам адам жеткізілді. Тінту жүргізіліп, ұрланған ағаштардың ондаған текше метрі, ағаш өңдеу станоктары, ақша және құжаттар тәркіленді. Филиал директоры мен қылмыс жасағандар уақытша ұстау изоляторына қамалды", – деді ІІМ ұйымдасқан қылмысқа қарсы күрес департаментінің өкілі Қуандық Алпыс.
Сондай-ақ, күдіктілердің лауазымдық өкілеттікті асыра пайдалану, пара алу, мүлікті жымқыру деректеріне қатысы бар-жоғы тексеріледі. Қазір тергеу жалғасып жатыр.
"Еске салайық, биыл қаңтарда Павлодар облысында "Ертіс орманы" республикалық мемлекеттік мекемесінің директорының басшылығымен әрекет еткен қылмыстық топ ұсталған болатын. Күдіктілерге қатысты ұйымдасқан қылмыстық топ құру, оған басшылық ету, мүше болу деректері бойынша іс тергеліп жатыр. Бұл бағыттағы жұмыс жалғасып жатыр", – деді Қуандық Алпыс.
