Семейде онкологиялық ауруларды емдейтін Қазақстандағы алғашқы Ядролық медицина орталығы ашылды, деп хабарлайды inbusiness.kz altaynews.kz-ке сілтеме жасап. Қазір орталықта еліміздің ядролық медицинасындағы жетекші мамандар мен ҚР Президент істері басқармасы медицина орталығы ауруханасының қызметкерлері бірлесіп жаңа технологиялардың жұмысын жолға қойып жатыр. ⠀
Орталықтың іске қосылуы үш кезеңге арналған жоспарға сәйкес біртіндеп жүзеге асырылады. Бірінші кезең аясында жұмысқа радиоизотопты диагностика бөлімі кірді. Онда орнатылған ОФЭКТ (бір фотонды-эмиссиялы компьютерлі томография) және компьютерлі томографпен біріктірілген ОФЭКТ мамандарға адам ағзасындағы қатерлі процестерді бастапқы сатыларында анықтағаны сияқты, басқа да көптеген онкологиялық емес патологияларды да анықтауға мүмкіндік береді.⠀⠀
Семей қаласының Ядролық медицина орталығы құрылысын жүргізу кезінде радионуклидтермен жұмыс істеуге алдын-ала дайындалған және арнайы оқытудан өткен мамандардың жеке тобы құрылды. Бүгінгі күні бөлімде 16 медицина қызметкер, олардың арасында ядролық медицина дәрігерлері, радиохимиктер, радиофармацевтер, медицина физиктері, радиациялық қауіпсіздік жөніндегі инженерлер бар. ⠀
Шілде айында Орталықты іске қосудың екінші кезеңі аясында радионуклидті терапияны енгізу, ал одан кейін 2021 жылдың қыркүйек айында үшінші кезеңге өту яғни, ПЭТ диагностика және ең заманауи циклотронда 18F-фтордезоксиглюкоза радиофармпрепратын өндіруді іске қосу жосарланып жатыр.
