Абай облыстық денсаулық сақтау басқармасы соққыға жығылған 6-сынып оқушысының қазіргі жағдайы туралы айтты, деп хабарлайды inbusiness.kz сайты.
Ведомствоның мәліметінше, ұл балаға дер кезінде медициналық және психологиялық көмек көрсетіліп, қажетті тексерулер жүргізілді. Ол 23 ақпан күні ауруханаға түскен.
"Диагноз – жабық бас-ми жарақаты. Басында, аяқ-қолдарында көптеген теріасты гематомалары анықталды. Баланың жағдайы салыстырмалы түрде қанағаттанарлық деңгейде, бірақ психоэмоционалдық күйі мен диагнозына байланысты бақылауды қажет етеді. Тиісті диагностикалық тексерулер жүргізілді. Тексеру қорытындылары бойынша өміріне қауіп төндіретін себептер анықталған жоқ", – делінген хабарламада.
Оқушы тіркелген емдеу орны бойынша толық медициналық және психологиялық көмек алды. Қазіргі уақытта бала педиатр, травматолог және невропатологтың динамикалық бақылауында.
Айта кету керек, осыған дейін Семейде оқушының соққыға жығылуы бойынша білім басқармасы қызметтік тексеріс бастағанын жазғанбыз.
