Сенаттың жалпы отырысында қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл жөніндегі түзетулерді қабылдады, деп хабарлайды inbusiness.kz сайты.
Сенат депутаттары "Қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топ туралы келісімге және Қылмыстық жолмен алынған кірістерді заңдастыруға, терроризмді қаржыландыруға қарсы іс-қимыл жөніндегі Еуразиялық топтың бюджетін қалыптастыру, атқару тәртібі туралы ережеге өзгерістер енгізу бойынша хаттаманы ратификациялау туралы" заңды қарады.
Сенатор Бекболат Орынбеков құжаттағы негізгі өзгерістерге тоқталды.
"2012 жылы ФАТФ ұсынымдары ауқымды түрде қайта қаралып, мандаты кеңейтілді, нәтижесінде жаппай қырып-жою қаруын таратуды қаржыландыруға қарсы іс-қимыл мәселелері қосылды. Хаттамада "ерікті жарна", "нысаналы ерікті жарна", "өзге түсімдер", "нысаналы қор" деген ұғымдық аппарат анықтамаларымен толықтырылды. Осылайша, Еуразиялық топтың бюджетін қалыптастыру көздері күшейтілді", - деді ол.
Сондай-ақ, басқа да техникалық түзетулер енгізілді.
Қазіргі таңдатопқа мүше 9 мемлекеттің 7-еуі хаттаманы ратификациялады. Ал, Қазақстан мен Қытай бұл құжатты ратификациялау бойынша ішкі мемлекеттік рәсімдерін жүргізіп жатыр.
"Құжатты ратификациялау, ұлттық заңнаманы жаппай қырып-жою қаруын таратуды қаржыландыруға қарсы іс-қимылды қоса алғанда, ФАТФ-тың жаңартылған стандарттарына сәйкес келтіруге, рәсімдер мен терминологияны біріздендіру есебінен қаржылық мониторинг жүйесін оңтайландыруға, сондай-ақ Еуразиялық топ шеңберіндегі халықаралық ынтымақтастықты нығайтуға мүмкіндік береді.
Сонымен қатар, хаттамадағы түзетулер Еуразиялық топ мақсаттары мен міндеттерін, үлестік жарналарды төлеудің параметрлері мен мерзімдерін нақтылауға, қосымша жұмыс форматтарын құруды регламенттеуге және қазіргі бар ағаттықтарды жоюға бағытталған", - деді Бекболат Орынбеков.
