Отырыс барысында өмірі қиын жағдайға тап болған және өзінің борышын өтеуге мүмкіндігі жоқ азаматтардың проблемаларын шешу бойынша өзекті мәселелер талқыланды, деп хабарлайды inbusiness.kz Сенаттың баспасөз қызметіне сілтеме жасап.
"Мемлекет басшысы Үкіметтің кеңейтілген отырысында қазақстандықтарға берілетін несие мәселесін шешу үшін 2023 жылғы 1 қаңтардан бастап "Жеке тұлғаларды оңалту және банкроттық туралы" заңды қолданысқа енгізу қажеттігін айтты. Бұл бастама біздің еліміз үшін аса маңызды. Жеке тұлғаның банкроттығы – азаматтың несие берушілер алдындағы қарыздарын толығымен өтеу немесе міндетті төлемдер жасауға заңды қабілетсіздігін анықтау мүмкіндігі, сондай-ақ көптеген адамдар үшін қаржылық қиындықтардан шығу, тұрғын үй, коммуналдық төлемдер бойынша берешекті және басқа да міндеттемелерді есептен шығару мүмкіндігі болады", - деді сенатор Серікбай Трұмов.
Кездесуге Жоғарғы соттың, Қаржы, Еңбек және халықты әлеуметтік қорғау, Әділет министрліктерінің, Қаржы нарығын реттеу және дамыту агенттігінің, Ұлттық банктің және басқа да бірқатар ұйымның өкілдері де қатысты.
"Бүгінде Елімізде 7 миллионнан астам борышкер бар. Олар тек банк пен коллекторлық агенттіктерге қарыз емес, коммуналдық төлемдер, алимент бойынша да берешектері бар азаматтар. Ал банктер мен микрокредиттік агенттіктердің алдында 1,5 млн адам берешек. Төлемді өтеу мерзімі 3 айдан асып кетсе, ол азамат берешектер тізіміне енгізіледі. Берешек бойынша мәселені кірістер комитеті сотқа жеткізбей шешу амалдарын ұсынады. Нәтиже болмаған жағдайда сот арқылы шешуге тура келеді", - деді ҚР Қаржы вице-министрі Ержан Біржанов Сенатта өткен жиында.
