Оңтүстік Корея мен АҚШ бірлесе ауқымды әскери жаттығу өткізеді, деп жазады inbusiness.kz сайты.
Шара ұшқышсыз аппараттардың шабуылына, GPS-жүйелер жұмысының бұзылуына және Солтүстік Кореяның дамып жатқан әскери мүмкіндіктеріне қарсы тұруға бағытталған. Вашингтон мен Сеул бұл жаттығулар тек қорғаныс сипатына ие дегенімен, Пхеньян оны арандату деп қабылдайды.
Ал өткен аптада Солтүстік Корея жақын қашықтыққа арналған баллистикалық зымыран ұшырып, Сеулдің сынына ұшырады.
UFS жаттығулары – Сеул Вашингтоннан соғыс уақытындағы операциялық бақылауды (OPCON) қайта қабылдап алғаннан кейін, одақтастардың Оңтүстік Кореяның біріккен күштерге жетекшілік ету қабілетін бағалайтын сынақ алаңы ретінде қарастырылады. Қазіргі уақытта тараптар келіскен OPCON-ды беру жоспарының үш кезеңінің екіншісі жүзеге асырылуда.
Оңтүстік Корея мен АҚШ жыл сайын екі ауқымды бірлескен жаттығу өткізеді: көктемде "Freedom Shield" (FS) және жазда "Ulchi Freedom Shield" (UFS).
