ҚР ИДМ азаматтық авиация комитеті инспекторларының тексеруі кезінде "Фауна Эйр" әуе компаниясының Қазақстан Республикасындағы азаматтық әуе кемелерінің пайдаланушыларына қойылатын сертификациялық талаптарды бұзғаны анықталды (1-деңгей), деп хабарлайды комитеттің баспасөз қызметі.
Ұшу қауіпсіздігін қамтамасыз етпегені үшін ҚР ИДМ азаматтық авиация комитеті 2018 жылдың 8 қазанынан бастап "Фауна Эйр" ЖШС-ге авиациялық жұмыстарға берілген Куәлігін пайдалануына шектеу қойды.
Бұған дейін азаматтық авиация комитеті ҚР бас көлік прокуратурасымен бірлесіп жүргізген жұмыстың нәтижесінде 17 ұшақтың және шағын авиацияның 2 әуе компаниясының (Азия Континенталь Авиалайнс және "КАЗАВИА" Тәуелсіз әуе компаниясы" ЖШС) қызметі уақытша тоқтатылған болатын. Сондай-ақ, рейстің және техникалық жұмыстардың сапасыз ұйымдастырылуына байланысты 16 әуе компанияның лауазымды тұлғасына қатысты тәртіптік шаралар қабылданды.
