Қазақстан Қытайдың ниетін құптайды, деп жазады Inbusiness.kz сайты мемлекет басшысының "ШЫҰ +" отырысындағы баяндамасына сілтеме жасап.
"Санкциялық қақтығыстар әлемдік экономикаға айтарлықтай зиян келтіреді, одан әрі даму перспективаларын тарылтады. Мұндай жағдайда біз оң динамиканы сақтауға және әлеуетті арттыруға бағытталған сауда-экономикалық өзара іс - қимылдың неғұрлым икемді стратегиясын құруымыз керек", – деді Қасым-Жомарт Тоқаев.
Мемлекет басшысы ШЫҰ мемлекеттерінің жаһандық ЖІӨ-дегі үлесі 30 пайызды құрайтынын және бүгінгі таңда қатысушы елдердің сыртқы саудасы 8 триллион доллардан асатынын – бұл бүкіл әлемдік сауданың төрттен бір бөлігіне тең екенін атап өтті.
"ШЫҰ мемлекеттерінің есебінен Азияның жаңа тарихи экономикалық өрлеуі – бүкіл жаһандық экономика үшін тұрақтандырушы фактор.
Қазақстан Қытайдың ШЫҰ елдерінің өзінің ауқымды нарығына қолжетімділігін кеңейту және тауар айналымын 3 триллион долларға дейін жеткізу ниетін құптайды", - деді Президент.
Астана қаласының Тәуелсіздік сарайында Қазақстан Республикасының төрағалығымен "ШЫҰ+" саммиті өтіп жатқанын еске саламыз.
