Белгілі актер Шәріп Серіктің бұрынғы сүйіктісі Әлия Бутеева тұрмыстық зорлық-зомбылық құрбаны болғанын мәлімдеді, деп хабарлайды inbusiness.kz сайты.
Әлия Бутеева актерға ұқсас адамның оның артынан жалаң аяқ жүгіріп шығып, лифттен күшпен шығарып алғаны бейнеленген видео мен суретті желіге жариялады. Суреттерден қыздың беті қызарып кеткенін байқауға болады.
"Ең қорқынышты түсімде де "маған сүйікті адамым қол көтерді" деп айтатын адам боламын деп ойламаппын. Бірақ солай болды. Меніңше, аттап кетуге болмайтын шекаралар болады", - деп жазды ол әлеуметтік желідегі парақшасында.
Публикация авторы бұл жазбаны жариялау оған оңай болмағанын, алайда зорлық-зомбылық кезінде үнсіз қалуға болмайтынын айтты.
"Мен физикалық тұрғыдан әлсіз болсам да, маған жат нәрсе туралы жасырып қалатындай әлсіз емеспін. Мен өзімді және абыройымды қорғауға мәжбүрмін", - деді Әлия Бутеева.
Желіде қазақстандықтар бұл жазбаның авторына қолдау білдіріп жатты.
Аталған жайт бойынша Алматы қалалық полиция департаменті түсінік берді.
"Бұл дерек бойынша тексеріс жүргізіліп жатыр. Оқиғаның мән-жайы, оның ішінде оқиғаның орны мен уақыты қолданыстағы заңнамаға сай анықталып, шаралар қабылданатын болады", - делінген хабарламада.
Salem Entertainment компаниясы актер Шәріп Серікпен әріптестік қарым-қатынасын тоқтату туралы шешім қабылдағанын жариялады.
"Соңғы оқиғаларға байланысты Salem Entertainment ұжымы Шәріп Серікті "қара тізімге" енгізіп, онымен кез келген ынтымақтастықты толығымен тоқтатты. Бұған дейін жарияланған "Шакал" сериалы мен "Qarga" сериалының үшінші маусымы ресми түрде жабылды. Сонымен қатар, актер Meow сериалының екінші маусымында басты рөлдердің бірін сомдауы тиіс болған, алайда ол жобадан алынып тасталды. Актермен барлық келісімшарт тоқтатылды", - деп хабарлады компания.
Бұдан бөлек "Патруль: последний приказ" фильмінің шығармашылық ұжымы Шәріп Серіктің қатысуымен түсірілген көріністерді кинонұсқадан алып тастау жұмыстарын жүргізіп жатқаны белгілі болды.
