Кеше Шығыс Қазақстан облысының Глубоковск ауданындағы шаруа қожалығында ірі өрт болып, бір адам қайтыс болды, деп хабарлайды облыстың ТЖ департаментінің баспасөз қызметі.
Ведомство мәліметінше, өрт сағат 4:00-де Жаңа Үлбі кентіндегі ферма аумағында басталған. Жалын ағаштан жасалған қабырғалар мен жекеменшік үйдің шатырын, сондай-ақ үйге жалғанып салынған шаруашылық құрылысын шарпыған.
"Өрт сөндірушілер келгенше, шаруа қожалығында істейтіндер қорадан 60 бас ірі қара мен 8 жылқыны шығарып үлгерген", – деп жазылған хабарламада.
Өрт сөндірушілер таңғы 8.00-ге қарай өрттің таралуын тоқтатып, сағат 12.00-де толық сөндіріп болды.
Оқиға орнынан 1982 жылы туған ер адамының денесі табылды. ТЖД-ның нақтылауынша, қайтыс болған адам шаурашылық аумағында тұрған.
Өрттің жалпы ауданы 672 шаршы метрді құрады. Онымен күреске 5 машина және өрт сөндіру қызметінің жеке құрамындағы 18 адам жұмылдырылды. Сондай-ақ ферманың 10 адамы болды.
