Онда жәбірленуші тараптың адвокаты Мейірман Шекеев сөз сөйлеп, сотталушылар мен олардың ата-аналарына ескерту айтты, деп хабарлайды inbusiness.kz сайты.
Оның айтуынша, ешкім ешкімді жазықсыз соттайын деп жатқан жоқ. Анығы, мұндай қылмысқа нақты жауап болмаса, ол жалғаса береді.
– Бір өкініштісі, айыпталушылар Қаржаубайды кінәлап жатыр, "сөйтпегенде, бүйтпегенде" деп. Ал сіздер келмегенде, төбелес болар ма еді? Бұл – екі тарап арасындағы жай сот емес, қоғамның күнделікті бетбұрысқа, әділдікке әрекеті, жаңа қадамы. Шерзат – 16 жастағы ғана бала. Ол топқа емес, біреуіңізге де қарсы шыға алмайтын бала еді. Мен сіздердің бойларыңыздан өкініш көре алмай отырмын. Осы жерде "тәрбиесі дұрыс емес болды" дегендер болды. Біз – аға буынбыз, әр сөзімізге жауап беруіміз керек. Шерзат пышаққа өзі барып соғылған жоқ. Адам өлгені – факт. Ешкім сіздерді кінәсізден кінәсіз соттайын деп тұрған жоқ. Қаржаубайдың да мақсаты сол, ол тек баласын жоқтап жүр. Бірақ, бұған ешқандай жауап болмаса, қылмыс ары қарай да жалғаса береді, – деді адвокат.
Мейірман Шекеев қылмысты ешкімнің мойындамағанын, солай бола тұра бір-бірін қорғайтынын айтады.
– Түптеп келгенде сіздер өздеріңізді, болашақтарыңызды қорғауларыңыз керек. Жауапкершілік алуларыңыз қажет. Қараңыздаршы, Шерзаттың өмір сүруге құқығы бар еді ғой. Осы күнге дейін қаншама журналист келді. "Неге ешқайсысы мойындамайды?" деп. Мен айттым: "Әлі мойындауға мүмкіндігі бар, соңғы сөзге дейін мойындайтын шығар" деп. Мына 9 сантиметрлік бәкі 12 сантиметрге дейін кіргені – бар күшімен кірді деген сөз. Қылмыскердің араларыңызда екенін біліп тұрсыздар, бірақ "мен емес" дейсіздер. Онда неге бір-бірлеріңізді қорғайсыздар? – деді ол.
Адвокат "баланы ата-анасының көзінше осылай өлтіріп жатса, басқа кезде, ешкім көрмейтін жерде топтап өлтіріп кетуге болатын шығар" деп ашынады.
– Қазір өз әрекетімізге жауапкершілік ала алмасақ, әрқайсымыздың үйімізде осындай қайғылы оқиға болады. Ата-аналары ренжіп жатыр, "қоғам бізді кінәлауда" деп. Ал сіздер өздеріңізді кінәламайсыздар ма? "Шерзаттың ажалы жетті" деген не сөз? Ата-ана осылай деп айтса, баласы не айтпайды, қандай әрекет етеді? – деді М.Шекеев.
Осыған дейін Шерзат сотында айыпталушы Азамат Тоқтаубаевтың анасына өлең арнағанын хабарлаған едік.
