2020 жылдың қаңтар-қарашасы аралығында ақша аударымдары жүйелері арқылы елімізге 258,4 млрд теңге қаржы бағытталды. Бұл бір жылда көрсеткіш 18,5%-ға төмендегенін айғақтайды. Мұндай үрдіс соңғы екі жылдан бері жалғасып келеді, деп хабарлады ranking.kz.
Қаржының көп бөлігі – 67,9 млрд теңге Ресейден аударылған. Бұл өткен жылдың сәйкес кезеңінен 43,7%-ға кем. Сонымен қатар елімізге ақша аударатын мемлекеттер қатарындағы Ресей үлесі 38,1%-дан 26,3%-ға төмендеген.
Одан кейінгі орында ақша аударымдарының көлемі 21,7%-ға азайып, 47,1 млрд теңгені құраған Оңтүстік Корея.
Дегенмен Өзбекстан мен Қырғызстаннан ақша аударымдарының көлемі 16,3% және 12,3%-ға артқан.
Аударымдар жүйелерінің ішінде 125,5 млрд теңге көрсеткішімен, әдеттегідей, "Золотая Корона" көш бастап тұр. Одан кейінгі орында Western Union (61,7 млрд теңге) мен MoneyGram (31,1 млрд теңге).
Құралай Құдайберген
