Алдын ала бағалау бойынша төлем балансының ағымдағы шоты өткен жылдың 1 тоқсандағы 0,9 млрд АҚШ доллары тапшылығымен салыстырғанда биылғы 1 тоқсанда профицитпен қалыптасып, 0,8 млрд АҚШ долларын құрады. Бұл туралы бас банк хабарлады.
"Ағымдағы шоттағы ахуалдың оң өзгерісіне сауда балансы профицитінің ұлғаюы себеп болды, ол алдын ала деректер бойынша 14,4%-ға ұлғайып, 7,1 млрд АҚШ долларын құрады. Тауарлар экспорты 9,9%-ға ұлғайып 15,0 млрд АҚШ долларын құрады. Тауарлар импорты 7,8 млрд АҚШ долларына дейін 6,1%-ға өсті", – делінген Ұлттық банк есебінде.
Шетелдік тікелей инвесторлардың кірістері 4,8 млрд АҚШ долларына дейін, яғни 16,9%-ға қысқарған.
1 тоқсанда шетелдік үлестес компаниялардың қазақстандық кәсіпорындар алдындағы өзінің борыштық міндеттемелерін өтеуі оң көрсеткіш берді. Шетелдік тікелей инвестициялар бойынша капиталдың таза әкелінуі 2,4 млрд АҚШ долларын құраған.
"Резервтік активтер 1 сәуірдегі жағдай бойынша 27,0 млрд АҚШ долларына бағаланды. Бұл тауарлар мен қызметтердің қазақстандық импортының 7,1 айын қаржыландыру қажеттілігін жабады", – деп хабарлайды бас банк.
